LibreOffice

Údar:

The Document Foundation

Ceadúnas: Saor ó chostas
Maidir Leis

Sraith feidhmchlár iomlán “foinse oscailte” agus “caighdeán oscailte” is ea LibreOffice atá comhoiriúnach le gach mórshraith feidhmchlár (Microsoft Office san áireamh). Tá sé saor in aisce agus tá an leagan is úire, 4.0.1, ar fáil i 104+ dteanga. Tá próiseálaí focal ann, scarbhileog mar aon le clár cur-i-láthair agus roinnt áiseanna eile. Is féidir comhaid PDF a chruthú go díreach leis, freisin.

Treoracha

Le Córas Oibriúcháin Ghaeilge:

Tá an bealach suiteála don chlár seo i bhfad níos simplí ná mar a bhíodh, má tá an córas oibriúcháin agat i nGaeilge:

Téigh go dtí an leathanach a luaitear thuas (faoin ardán a oireann duitse). Ba cheart go bhfeicfeá rud éigin cosúil leis an bpictiúr seo thíos:

Déan cinnte gur Gaeilge atá sa bhosca agat. Mura bhfuil Gaeilge roghnaithe agat don chóras oibriúcháin ar an ríomhaire, tá seans ann go gcuirfear teanga éigin eile isteach sa bhosca, mar sin sin cinntigh gur Gaeilge atá ann!

Ansin, íosluchtaigh, agus lean na treoracha. Níl rud ar bith as an ngnáth le déanamh.

Is comhad mór atá i gceist, beagnach 200MBheart, mar sin tógfaidh sé cúpla nóiméad le híosluchtú.

Ba cheart duit an ghnáthshuiteáil a roghnú. Iontach simplí! Tógfaidh sé roinnt nóiméad.

Ansin, bain leas as!

Gan córas oibriúcháin Ghaeilge:

Sa chás seo, mura nglacann tú na céimeanna seo a leanas, suiteálfar LibreOffice i dteanga do chórais oibriúcháin (mar shampla Béarla, fiú má roghnaíonn tú “GA - Gaeilge” mar theanga do LibreOffice. Dar le LibreOffice, bíonn tús-áite ag teanga an chórais.)

Chun LibreOffice a shuiteáil i nGaeilge, caithfidh tú sain-shuiteáil a roghnú ag an tús, mar seo:

  • Íosluchtaigh agus tosaigh an tsuiteáil, ag roghnú “Custom Install”.

  • Roghnaigh “Additional Interface Languages”.

  • Roghnaigh Gaeilge (agus fo-aicmí).

  • Nuair atá an tsuiteáil déanta, tosaigh LibreOffice agus, más gá, roghnaigh Tools > Options agus roghnaigh Gaeilge de réir mar is gá.

Nóta: Buíochas le hAonghus Ó hAlmhain dos na treoracha seo

Gaelspell

Freisin, sa chás seo, is gá duit an foclóir Gaelspell a íosluchtú go neamhspleách. Aimsigh anseo é.

Léirmheas

Cad atá ann?

  • Writer: córas ullmhúcháin cáipéisí fuinniúil lenar féidir leat cáipéisí, tuarascálacha, nuachtlitreacha agus leabhráin a chruthú.
  • Calc: scarbhileog atá lán le gnéithe sainiúla.
  • Impress: An modh is tapúla chun taispeántais ilmheán a chruthú.
  • Draw: Cuirfidh an clár seo ar do chumas idir léaráidí simplí, léiriúcháin bhríomhara thríthoiseacha, agus maisíochtaí éagsúla a dhéanamh.
  • Base: Clár anailíse láidir a thabharfaidh na huirlisí cuí duit gnáthobair ar bhunachar sonraí a dhéanamh.
  • Math: Clár a chuidíonn leat obair le cothromóidí matamaiticiúla.

Is féidir Writer a úsáid in ionad Word, Calc a úsáid in ionad Excel, agus Impress in ionad Powerpoint. Níl macasamhail Outlook (an clár ríomhphoist i Micrsoft Office) sa phacáiste, ach is féidir Mozilla Thunderbird a úsáid chuige sin (clár eile foinse oscailte a úsáidtear go forleathan), agus atá ar fáil i nGaeilge (Féach anseo).

Ar ndóigh, an difear is suntasaí idir LibreOffice agus Microsoft Office ná go bhfuil an chéad cheann acu saor ó chostas.

Cruthú Comhad PDF

Is féidir comhaid PDF a chruthú go díreach le LibreOffice ar bhealach an-éasca.

Gaeilge

Tá an tacaíocht is fearr Gaeilge do aon phróiseálaí focal ar fáil do LibreOffice Writer. Tá litreoir leictreonach (Gaelspell) a athnuaitear go minic ann, mar aon le teasáras. Ceaptar go mbeidh áis scrúdaithe graiméir ann freisin go luath. Tá a thuilleadh eolais ann faoi ar scriobh.ie.

Cúlra

D’eascair LibreOffice as OpenOffice.org mar gheall gur ghlac an chuideachta Oracle seilbh ar Sun Microsystems, an chuideachta a chruthaigh OpenOffice.org. Shíl lucht tacaíochta OpenOffice.org go raibh baol ann nach mbeadh foinse oscailte ag OpenOffice.org a thuilleadh nó nach ndéanfaí tuilleadh forbairt air. (D’fhógair Oracle i mí Aibreáin 2011 nach bhfuil sé chun OpenOffice.org a fhorbairt ar bhonn tráchtála as seo amach.) Dá bharr sin, roghnaigh lucht tacaíochta OpenOffice.org córas nua a chruthú. Is éard is brí le libre ná ‘saor’ i bhFraincis, ar ndóigh.

Aistriúchán

Bainisteoir Aistriúcháin:

Kevin Patrick Scannell

An tAistriúchán:

Tá an ríomhchlár ar fad aistrithe go Gaeilge. Tá an litreoir leictreonach Gaelspell ar fáil dó freisin.

Tá an t-aistriúchán an-mhaith agus an-sothuigthe.

  TUAIRIMÍ NA LÉITHEOIRÍ